Sojojin Kiyaye Juyin Juya Halin Iran (IRGC) sun sanar a ranar Alhamis cewa rundunar sojin ruwan ƙasar ta kai hari kan wani jirgin dakon mai na Amurka a yankin Gulf, lamarin da ke ƙara tsananta rikicin da ya kunno kai tsakanin Iran, Amurka da Isra’ila.
A wata sanarwa da sashen hulɗa da jama’a na rundunar ya fitar, wanda kamfanin dillancin labarai na gwamnati IRNA ya wallafa, an ce rundunar ruwan Iran ta “yi nasarar kai hari” kan jirgin a arewacin Gulf. Sai dai ba a bayar da ƙarin cikakkun bayanai kan harin ba, kuma Amurka ba ta yi martani nan take kan wannan ikirari ba.
Rikicin ya ƙara tsananta ne tun bayan hare-haren da Amurka da Isra’ila suka kai kan Iran, wanda rahotanni suka ce ya yi sanadin mutuwar mutane sama da 900, ciki har da jagoran addini Ali Khamenei da wasu manyan jami’an soji. A martani, Iran ta ci gaba da kai hare-hare ta amfani da drones da makamai masu linzami da suka nufi Isra’ila da wasu ƙasashen Gulf da ke dauke da sansanonin sojin Amurka.
