Duk da cewa adadin ya ragu idan aka kwatanta da bara, har yanzu dubbai na rasa rayukansu a ƙoƙarin neman rayuwa mafi kyau. Wani sabon rahoto ya nuna cewa fiye da mutum 3,000 sun mutu a shekarar 2025 yayin ƙoƙarin ketare teku zuwa Spain. Kungiyar agaji ta Caminando Fronteras ta bayyana cewa mutane 3,090 sun nutse tsakanin Janairu zuwa 15 ga Disamba 2025, ciki har da mata 192 da yara 437.
Masu tafiye-tafiye sun fito ne daga ƙasashe 30, mafi yawansu daga Afirka ta Yamma da Arewacin Afirka, tare da wasu daga Pakistan, Siriya, Yemen, Sudan, Iraq da Masar. Duk da raguwar adadin mutuwa, masana sun gargadi cewa hakan ba yana nufin tafiyar ta zama mai aminci ba, domin tsauraran matakan kan iyaka na tursasa mutane shiga hanyoyin da suka fi haɗari.
Rahoton ya nuna cewa hanyar Atlantika zuwa Tsibiran Canary ce ta fi haddasa mutuwa, inda mutum 1,906 suka rasa rayukansu, yayin da hanya daga Aljeriya zuwa Tsibiran Balearic ta yi sanadin mutuwar 1,037. Haka kuma an gano sabuwar hanya daga Guinea zuwa Canary, wadda ta ƙara haɗari ga masu ƙaurar.
Rahoton ya kuma soki manufofin hijira na duniya, musamman na Amurka, da ya ce suna ƙara jefa ’yan ci-rani cikin haɗari, tare da kwatanta su da shirin Birtaniya na kai masu neman mafaka Rwanda da tsarin Italiya na cibiyoyi a Albania.
