Gwamnatin Gambiya ta zargi ƙasar Myanmar da aiwatar da abin da ta kira “mummunar tashin hankali na kisan kare dangi” kan ‘yan tsirarun Rohingya, yayin zaman shari’a a gaban Kotun Duniya (ICJ) da ke The Hague. Ministan Shari’a na Gambiya, Dawda Jallow, ya ce Rohingya an kai musu hari ne da gangan domin a shafe su daga doron ƙasa, tare da aikata kisan gilla, fyade da kone-kone.
Ya nemi kotun ta tabbatar da cewa Myanmar ta karya yarjejeniyar duniya kan kisan kare dangi, tare da umarnin dakatar da laifukan, biyan diyya da kuma ɗaukar matakan hana maimaituwar hakan. Gambiya ta dogara ne da rahotannin Majalisar Ɗinkin Duniya da ƙungiyoyin kare haƙƙin ɗan Adam, waɗanda suka tabbatar da alhakin gwamnatin Myanmar.
Kotun ta riga ta ɗauki matakan gaggawa a 2020, yayin da ake sa ran kammala shari’ar a ranar 29 ga Janairu, a lokacin da sama da ƙasashe 11 ke mara wa Gambiya baya. Tun 2017, kusan Rohingya miliyan ɗaya ne suka tsere zuwa Bangladesh domin guje wa tsanantawar da ake yi musu.
