Majalisar kula da Tattalin Arzikin Ƙasa ta Nijeriya (NEC) ta amince da wani shiri da ta kira “tsarin matakai na tattalin arziki na kwanaki 90” domin rage tsadar rayuwa sakamakon garambawul na tattalin arziki da yaƙe-yake da ake yi a wasu ƙasashen duniya.
Mai magana da yawun mataimakin shugaban ƙasa Kashim Shettima, Stanley Nkwocha, ne ya bayyana wannan shirin a cikin wata sanarwa da ya fitar ranar Alhamis.
Sai dai kuma sanarwar ba ta ba da cikakken bayani ba game da shirin duk da cewa ta ce zai mayar da hankali ne kan rage tsadar rayuwa da kawo sauƙin kayayyakin abinci da janyo zuba jari daga ƙetare da kuma gaggauta kammala ayyuka domin jin daɗin ‘yan Nijeriya.
“Tsarin aikin na kwanaki 90 zai mayar da hankali kan fannoni biyar ne: sauƙin abinci da daidaita haraji da kammala ayyuka masu tasiri sosai da warware matsaloli na zuba jari da kuma tsararren tallafi wa gidaje,” in ji Nkwocha.
‘Yan Nijeriya suna fama da tsadar rayuwa mafi muni a cikin gomman shekaru.
Matsalar na faruwa ne bayan gwamnatin ƙasar ta yi garambawul a fannin tattalin arziki da ya haɗa cire tallafin mai da kuma mayar da harkar kasuwar musayar kuɗin ƙasar ta halin da kasuwa ta yi.
Yaƙe-yaƙen Amurka da Isra’ila kan Iran da kuma na Rasha da Ukraine, sun ƙara munana tsadar rayuwa a Nijeriya.
Garambawul ɗin ya inganta jumullar tattalin arzikin ƙasar, inda kuɗin ajiyar ƙasar na ƙetare da kuma zuba jari daga ƙetare ya ƙaru sosai.
Sai dai kuma yawancin ‘yan Nijeriya da suka fi miliyan 200 suna fama da ƙarin tsadar rayuwa fiye da yadda lamarin yake kafin Tinubu ya karɓi ragamar mulkin ƙasar.
Ministan Kuɗin Nijeriya, Taiwo Oyedele, ne ya gabatar da tsarin ayyukan na kwanaki 90 a lokacin zaman majalisar da ke kula da tattalin arziƙin ƙasar na 161 da aka yi ta intanet a ƙarƙashin jagorancin Mataimakin Shugaban Ƙasa Kashim Shettima ranar Alhamis.
Mataimakin shugaban ƙasar ne yake jagorantar majalisar tattalin arzikin inda dukkan gwamnonin jihohin ƙasar suka kasance mambobin majalisar.
