Hawaye, shiru da alhini sun mamaye garin Crans-Montana da ke Switzerland, yayin da daruruwan mutane suka taru cikin sanyi mai tsanani a daren Alhamis domin tunawa da waɗanda suka rasa rayukansu a gobarar da ta tashi yayin murnar Sabuwar Shekara.
Mutane sun riƙe kyandirori, sun ajiye furanni, tare da tsayawa ba tare da motsi ba, suna kallon wurin da gobarar ta faru a mashayar Le Constellation, inda aka rasa rayuka da dama. A cewar Ministan Harkokin Wajen Italiya, Antonio Tajani, aƙalla mutane 47 ne suka mutu, yayin da 112 suka jikkata bayan gobarar ta ɓarke a mashayar da ke cike da jama’a jim kaɗan bayan tsakar dare a daren Sabuwar Shekara.
Gobarar ta janyo gagarumin aikin ceto, inda aka tura motocin asibiti da jiragen sama masu saukar ungulu. An kwashe waɗanda suka jikkata zuwa asibitoci daban-daban a faɗin Switzerland, har ma da wasu ƙasashe, ciki har da cibiyoyin kula da masu ƙonewa. Hukumomi sun tabbatar da cewa binciken laifi kan musabbabin gobarar na ci gaba.
Mutane da dama da suka halarci taron tunawa sun tsaya cikin shiru, wasu na magana da raɗaɗi kawai. Wani matashi mai suna Orosstevic ya ce da yawa daga cikin abokansa da ‘yan uwansa sun kasance a mashayar a lokacin gobarar. “Wasu sun mutu, wasu kuma suna asibiti. Na kawo furanni ne domin girmamawa ta ƙarshe,” in ji shi.
A kusa da wurin, an ga abokai suna rungume juna suna kuka, yayin da wasu ke kallon gaba cikin firgici da alhini. Wani mazaunin gari, Mathys, ya bayyana mashayar a matsayin wuri da suke yawan taruwa kusan kowane ƙarshen mako. “Mun yi zaton ƙaramin gobara ce kawai. Amma abin da muka gani ya wuce misali. Bala’i ne,” in ji shi.
Wasu iyaye sun bayyana yadda ‘ya’yansu suka kusa kasancewa a wurin a daren, lamarin da ya ƙara musu firgici. Wani ya ce ɗansa ya tsira ne bisa sa’a, yayin da wani abokinsa ke karɓar magani a Jamus. An toshe hanyar zuwa mashayar, inda jami’an tsaro biyu ke tsaye. A kan wani tebur na wucin-gadi, mutane suna ajiye kyandirori da furanni, yayin da wasu ke shimfiɗa kyandirori kai tsaye a kan ƙasa mai sanyi.
A halin da ake ciki, wasu mashaya a garin sun rufe ƙofofinsu domin nuna alhini, yayin da aka gudanar da taron addu’a a cocin Montana-Station domin tunawa da rayukan da aka rasa.
Daya daga cikin mazauna garin ya ce, “Abin da ya rage mana yanzu shi ne bege.” Wata tsohuwa mai suna Veronica, wadda ta shafe shekaru 40 a garin, ta ce cikin hawaye: “Raɗaɗin wasu, raɗaɗin kowa ne.
