Gwamnatin Kenya ta fara amfani da kyamarori da jami’an kwastam da masu kula da iyakoki za su rika sawa a jikinsu domin ƙara inganta gaskiya da sauƙaƙa harkokin kasuwanci da tafiye-tafiye. Wannan shiri yana karkashin jagorancin hukumar tara kudaden shiga ta Kenya (Kenya Revenue Authority).
A karkashin wannan mataki, za a girka kusan kyamarori 350 a wuraren kan iyaka da manyan cibiyoyin sufuri, ciki har da filin jirgin sama na Jomo Kenyatta International Airport, wanda yake daga cikin manyan filayen jiragen sama mafi cunkoso a Afirka.
Hukumomi sun ce an kawo wannan tsarin ne domin rage cin hanci da rashawa tare da saurin warware sabani tsakanin jami’ai da matafiya. A cewarsu, rikodin da kyamarorin ke yi zai taimaka wajen ƙara kwarewa, gaskiya da kuma ɗaukar alhaki a tsakanin ma’aikata.
Shirin ya zo ne a daidai lokacin da ake nuna damuwa kan zargin cin hanci da haɗin kai tsakanin wasu jami’an kan iyaka, lamarin da ake cewa yana taimakawa wajen kauce wa biyan haraji da kuma safarar haramtattun kayayyaki.
Sabbin na’urorin suna dauke da fasahar GPS na ainihin lokaci, tsarin rikodi mai tsaro da kuma damar watsa bidiyo kai tsaye, wanda zai ba shugabanni damar sa ido kan ayyukan jami’ai da kuma duba duk wani lamari idan ya taso.
