Kungiyar Pyramids ta Masar ta yi bankwana da gasar CAF Champions League bayan ta sha kashi 2-1 a gida a hannun FAR Rabat ta Morocco, wanda ya ba bakin damar tsallakawa zagayen gaba da jimillar kwallaye 3-2. Wannan sakamako ya zo da mamaki, musamman ganin cewa Pyramids na cikin kungiyoyin da ake sa ran za su kai nesa a gasar.
A wani bangare kuma, Al Ahly — wacce ta fi kowa lashe gasar — ita ma ta fice bayan ta sha kashi 3-2 a gida a hannun Esperance ta Tunisia, inda suka fice da jimillar 4-2. Yanzu Esperance za ta fafata da Mamelodi Sundowns ko Stade Malien domin samun tikitin zuwa wasan karshe mai dauke da babbar kyauta ta dala miliyan 6.
Wasan Pyramids ya kunshi muhawara, musamman kan kin ba su fanareti duk da amfani da VAR, lamarin da ya tayar da kura. Duk da haka, FAR Rabat ta yi anfani da damar da ta samu, inda ta zura kwallaye biyu kafin Pyramids ta rage tazarar.
Fitar Al Ahly kuma ta kara jefa makomar kocinta Jess Thorup cikin hadari, inda rahotanni ke cewa yana iya rasa aikinsa. A daya bangaren, sauran wasannin zagayen za su ci gaba, yayin da wasu kungiyoyi ke fafatawa domin cika guraben wasan kusa da na karshe.
