Shugaban Ghana, John Mahama, ya yi kira ga ƙasashen Afirka da su haɗa ƙarfinsu su rika tattaunawa da duniya a matsayin ƙasa ɗaya, domin kawar da raunin da suke fuskanta a yarjejeniyoyi na ƙasa da ƙasa. Ya ce idan Afirka ta ci gaba da yin ciniki da tattaunawa ƙasa-ƙasa, za ta ci gaba da zama mai rauni a gaban manyan ƙasashe.
Mahama ya bayyana hakan ne a taron Tattalin Arzikin Duniya (WEF) a Davos, Switzerland, inda ya ce tsarin haɗin gwiwar duniya bayan Yaƙin Duniya na Biyu na ruguje, kuma ƙasashe yanzu suna fifita muradunsu kaɗai. Ya ƙara da cewa tallafin jin kai daga ƙasashen masu arziki yana raguwa, yayin da suke karkatar da kuɗaɗe zuwa harkokin tsaro.
Ya ce yawancin ƙasashen Afirka na cikin abin da ya kira “dogaro sau uku”:
Dogaro da wasu wajen tsaro,
Dogaro da su a kiwon lafiya da ilimi,
Da kuma fitar da ma’adanai ba tare da cin moriyar ƙimarsu sosai ba.
Mahama ya jaddada cewa Afirka dole ta fara mallakar albarkatunta da kanta, ta haɗa ƙarfi wajen tattaunawa kan ma’adanai, kasuwanci da tallafin yanayi, domin samun riba mai yawa.
“Dole ne mu tattauna a matsayin ƙasa ɗaya. Idan muka rabu, za mu ci gaba da zama masu rauni. Haɗin kai ba ya zama taken magana kawai; dole ya zama dabararmu,” in ji shi.
