Ayari na motocin agaji ya tashi daga Qatar zuwa Sudan domin kai kayan taimako a yayin da ƙasar ke fama da matsananciyar matsalar jin kai sakamakon yaƙi.
Ayarin, wanda ya ƙunshi manyan motoci bakwai ɗauke da magungunan gaggawa da na ceton rai, na cikin haɗin gwiwa tsakanin Qatar Fund for Development da Qatar Red Crescent Society. Jami’ai sun ce wannan shi ne matakin farko na shirin tallafi mai faɗi.
Qatar ta bayyana aniyarta ta aika karin kwantena 70 na abinci da kayan lafiya, da darajarsu ta haura dala miliyan 3.6, domin tallafa wa akalla mutane rabin miliyan a jihohi 12 na Sudan.
Wakilan hukumomin agaji sun jaddada cewa shirin zai taimaka wajen ci gaba da ayyukan kiwon lafiya, musamman a yankunan da rikici ya fi shafa. Sudan dai na ci gaba da fuskantar yaƙi tsakanin sojojin gwamnati da Rapid Support Forces, wanda ya haddasa asarar rayuka da hijirar miliyoyin mutane.
Majiyar Labari: TRT AFRIKA
