Shekaru uku bayan girgizar ƙasa mai muni da ta girgiza kudancin Turkiyya, tunanin ranar 6 ga Fabrairu 2023 har yanzu yana ratsa zukatan mutane da dama. A ranar Juma’a, Shugaban ƙasar Turkiyya Recep Tayyip Erdogan ya tsaya domin tuna rayukan da aka rasa da kuma jaddada irin ƙoƙarin da ƙasar ta yi wajen farfaɗo da yankunan da bala’in ya lalata.
A wani saƙo da ya wallafa a shafin sada zumunta na NSosyal, Erdogan ya ce Turkiyya ba za ta taɓa mantawa da mutanen da suka mutu a girgizar ƙasa guda biyu da suka afku a larduna 11 ba. Ya bayyana cewa gwamnati ta ɗauki nauyin kare amanar waɗanda suka rasu tare da sake gina biranen da suka lalace.
Shugaban ya ce cikin shekaru uku kacal, Turkiyya ta samu nasarar sake gina gidaje, kayayyakin more rayuwa da wuraren jama’a, yana mai cewa hakan shaida ce ta cika alƙawarin da aka yi wa al’umma. Tare da sakon nasa, Erdogan ya wallafa bidiyo da ke nuna barna ta 2023 da kuma ci gaban sabbin gine-gine da aka kammala.
Girgizar ƙasar da ta faru a tsakiyar lardin Kahramanmaras ta yi sanadin mutuwar dubban mutane tare da haddasa mummunar barna a kudancin Turkiyya, lamarin da ya shiga cikin tarihin ƙasar a matsayin ɗaya daga cikin bala’o’i mafi muni. Ana sa ran Erdogan zai halarci bukukuwan tunawa da waɗanda abin ya shafa daga baya a ranar.
Majiyar Labari: TRT HAUSA
