Shugaban ƙasar Madagascar, Michael Randrianirina, ya nada shugaban hukumar yaki da cin hanci ta ƙasar, Mamitiana Rajaonarison, a matsayin sabon firayim minista. Wannan na zuwa ne kwanaki kaɗan bayan da shugaban ya kori tsohon firayim minista da kuma dukkan mambobin majalisar ministoci.
Randrianirina, wanda ya hau mulki a watan Oktoba tare da alkawarin kawo manyan gyare-gyare, ya ce sabon firayim ministan zai jagoranci gwamnati a kan abin da ya kira “hanya mai tsabta,” domin dawo da amincewar jama’a ga hukumomin ƙasa.
A wani jawabi da aka watsa a gidan talabijin na ƙasa, shugaban ya yaba da mutuncin Rajaonarison, yana cewa irin wannan gaskiya da riƙon amana ne ƙasar ke bukata daga shugabanni — mutanen da ba za a iya ruɗa su ko sayen su da kuɗi ba.
Duk da haka, shugaban bai bayyana dalilin da ya sa aka sallami tsohon firayim minista Herintsalama Rajaonarivelo da dukkan majalisar ministoci ba. Tun bayan hawansa mulki, Randrianirina na kokarin aiwatar da shirin siyasa da ya kira “Refoundation,” wanda ke da nufin sake gina cibiyoyin gwamnati, yaki da cin hanci, da kuma dawo da amincewar jama’a ga shugabancin ƙasa.
