Sojojin Burkina Faso sun sanar da cewa sun kashe akalla mutane 100 da suke zargi ‘yan ta’adda ne a watan Fabrairu yayin jerin hare-haren soji da aka gudanar a sassa daban-daban na kasar. Kakakin rundunar sojin kasar, Abdoul Aziz Ouédraogo, ya bayyana cewa wadannan hare-hare sun kuma taimaka wajen kwato wasu garuruwa da ‘yan bindiga suka mamaye a baya.
A wata hira da ya yi da gidan talabijin na Radiodiffusion Télévision du Burkina, Ouédraogo ya ce kokarin kai hare-haren da ‘yan ta’adda suka yi ya ci tura sakamakon martanin da sojojin suka mayar. Ya kara da cewa hare-haren da aka kai da kuma bincike a wasu yankuna sun tilasta ‘yan bindiga tserewa, inda aka kashe kusan dari daga cikinsu.
Kakakin rundunar ya kuma bayyana cewa karfin sojojin kasar ya karu a ‘yan kwanakin nan, duka ta fuskar yawan sojoji da kayan yaki. A cewarsa, an tura sabbin rundunoni da aka kafa zuwa fagen daga, sannan an fara amfani da sabbin makaman atilari da aka saya domin karfafa ayyukan tsaro.
Ya kara da cewa a tsakiyar watan Fabrairu sojojin sun gudanar da wasu hare-hare masu zurfi da suka ba su damar sake kwace iko da wasu garuruwa da aka dade ba a karkashin gwamnati ba tun daga shekarar 2019, ciki har da Tongomayel, Béléhédé da Pobé-Mengao a arewacin kasar.
Majiyar Labari: AA
