Somalia na shirin fara bayar da fasfon East African Community (EAC) ga ‘yan ƙasarta, inda za ta shiga sahun sauran ƙasashen mambobin ƙungiyar da ke amfani da wannan takardar tafiye-tafiye ta bai-daya. Matakin na nufin sauƙaƙa zirga-zirga da ƙarfafa haɗin kai a yankin Gabashin Afirka.
Jakadan Somalia a Tanzania ya miƙa samfurin fasfon da aka amince da shi ga Ministan Harkokin Cikin Gida da jami’an shige da fice. Wannan ci gaba na nuna wani muhimmin mataki na diflomasiyya da kuma shirye-shiryen fara amfani da fasfon a hukumance.
Somalia ta samu izinin buga fasfon EAC tun Disamba 2025. Fasfon na EAC, wanda aka ƙaddamar da shi a 2016, takarda ce da ake amincewa da ita a matakin ƙasa da ƙasa, kuma tana da nau’o’i uku: Diplomatic, Service da Ordinary.
Somalia ta zama mamba ta takwas a EAC a Maris 2024, kuma tuni ta naɗa wakilai a Majalisar Dokoki ta Gabashin Afirka, lamarin da ke nuna zurfafa shiga cikin harkokin yankin.
Majiayar Labari: TRT AFRIKA
