A wani mataki da ya girgiza harkokin kasuwanci da siyasar duniya, Shugaban Amurka Donald Trump ya sanar da kakaba haraji kan kayayyakin wasu manyan ƙasashen Turai, yana danganta matakin da batun tsaron ƙasa da kuma burin Amurka na karɓe ikon yankin Greenland.
Trump ya ce daga ranar 1 ga Fabrairu, Amurka za ta kakaba harajin kashi 10 cikin 100 kan kayayyakin da ke shigowa daga Denmark, Norway, Sweden, Faransa, Jamus, Birtaniya, Netherlands da Finland, sannan a daga watan Yuni harajin zai ƙaru zuwa kashi 25. Ya bayyana cewa matakin ya shafi “tsaron ƙasa” ne dangane da Greenland, wanda ke ƙarƙashin ikon Denmark, yana mai cewa Amurka na bukatar yankin domin kare kanta daga barazanar China da Rasha. Trump ya ƙara da cewa harajin zai ci gaba har sai an cimma yarjejeniya kan mallakar Greenland gaba ɗaya.
