Shugaban Amurka, Donald Trump, ya ce ba a cim ma wani takamaiman abu ba a ganawarsa da Firaministan Isra’ila, Benjamin Netanyahu, amma ya nanata bukatar ci gaba da tattaunawa da Iran domin yiwuwar ƙulla yarjejeniya. A sakonsa na Truth Social, Trump ya ce mafita ta diflomasiyya ita ce abin da ya fi so, sai dai ya gargadi cewa idan hakan bai yiwu ba, dole ne a duba sauran zaɓuɓɓuka. Ya kuma bayyana cewa sun tattauna batutuwan Gaza da halin da yankin Gabas ta Tsakiya ke ciki.
Ofishin Netanyahu ya ce Firaministan ya jaddada muhimmancin tsaron Isra’ila a duk wata tattaunawa da Iran. Ganawar, wadda ita ce ta bakwai tsakanin shugabannin biyu tun bayan dawowar Trump kan mulki, an gudanar da ita ne a ɓoye a Fadar White House. Wannan na zuwa ne bayan Amurka da Iran sun sake soma tattaunawar nukiliya a Oman, bayan dakatarwar da ta biyo bayan hare-haren sama da rikicin da ya gabata.
Majiyar Labari: TRT HAUSA
