Gwamnatocin Turai da dama sun fitar da sanarwar tsaro ga ‘yan ƙasarsu da ke Mexico, sakamakon arangamar makamai, toshe hanyoyi da wasu hare-hare a jihohi da dama. Matakin ya biyo bayan wani babban samame da jami’an tsaron Mexico suka kai kan ƙungiyoyin masu aikata laifuka.
United Kingdom, Belgium, Italy da France sun shawarci ‘yan ƙasarsu su zauna a gida tare da kauce wa tafiye-tafiye marasa muhimmanci, musamman a Jalisco. Rahotanni sun nuna yiwuwar toshe hanyoyin zuwa filayen jiragen sama da kuma tashe-tashen hankula a birane kamar Guadalajara da Puerto Vallarta.
Jakadun ƙasashen sun ce an samu harbe-harbe, ƙone motoci da kasuwanni, da kuma shingayen hanya a jihohi ciki har da Guanajuato da Michoacán. Hukumomin Faransa sun kuma ambaci wasu jihohin makwabta da tashin hankalin ya shafa.
Sanarwar tsaron ta ƙara ƙarfi bayan rahotannin mutuwar Nemesio Oseguera Cervantes, wanda aka fi sani da “El Mencho”, jagoran wata babbar ƙungiyar miyagun ƙwayoyi. Hukumomin Jalisco sun ayyana jan-gargadi, sun dakatar da sufuri na jama’a tare da roƙon mazauna su zauna a gida yayin da jami’an tsaro ke ci gaba da aiki.
