Serikali ya Uturuki imeishutumu Ugiriki kwa kile ilichokiita ukiukaji wa sheria za kimataifa, baada ya Ugiriki kudaiwa kuanzisha maeneo ya kupiga marufuku uvuvi katika maeneo ambayo haina mamlaka nayo.
Katika taarifa iliyotolewa Jumanne, Wizara ya Mambo ya Nje ya Uturuki ilisema imegundua kuwa mamlaka ya ufuatiliaji wa uvuvi ya Ugiriki ilichapisha ramani zinazoonyesha maeneo yenye vikwazo vya uvuvi nje ya mipaka yake halali.
Kwa mujibu wa Ankara, ramani hizo zinaonyesha mipaka ya baharini “isiyokuwepo na ya kufikirika” kati ya nchi hizo mbili katika Bahari ya Aegean na Mashariki ya Mediterania. Uturuki imesisitiza kuwa ramani hizo hazina uhalali wa kisheria na zinakiuka mamlaka yake ya bahari.
Aidha, Uturuki imetangaza kuwa haitatambua vikwazo vyovyote vya uvuvi vilivyowekwa na Ugiriki nje ya eneo lake la maili 6 za bahari, ikisema hatua hizo ni batili na zinapingana na sheria za kimataifa.
Serikali ya Uturuki pia imeonya kuwa haitakubali hatua za upande mmoja ambazo zinaweza kuathiri shughuli halali za wavuvi wake, huku ikisisitiza umuhimu wa kuheshimu haki za kihistoria na sheria za kimataifa.
Hata hivyo, Ankara imeeleza kuwa bado iko tayari kutatua migogoro na Ugiriki kwa njia ya amani na kwa kuzingatia makubaliano ya kimataifa, ikiwemo Tamko la Atheni la mwaka 2023 kuhusu uhusiano wa kirafiki.
CHANZO: TRT Afrika
