Al’ummar ƙauyen Gauza a Ƙaramar Hukumar Jahun, Jihar Jigawa, sun shiga firgici bayan ‘yansandan jihar sun kama wata sabuwar amarya bisa zargin saka wa mijinta maganin ɓera a abinci, abin da ya yi sanadiyyar mutuwarsa ƙasa da awanni bayan cin abincin.
Rundunar ‘Yansandan ta ce lamarin ya faru ne da yammacin ranar 23 ga Janairu, 2026, inda mamacin ya ci abinci daga hannun matarsa, sannan ya kamu da matsananciyar rashin lafiya. Duk da an garzaya da shi asibiti, likitoci sun tabbatar da mutuwarsa. Bayan bincike, amaryar ta amsa cewa ita ce ta saka gubar, tana mai cewa an tilasta mata auren.
Kwamishinan ‘Yan Sanda ya umarci Sashen Binciken Manyan Laifuka (SCID) a Dutse da su zurfafa bincike, tare da shirin gurfanar da wadda ake zargin gaban kotu bayan kammala bincike. Rundunar ta bukaci jama’a da su guji ɗaukar doka a hannunsu, su bi hanyoyin shari’a wajen warware matsalolin aure da na iyali.
