Shugaban Amurka Donald Trump ya ce ya sanya hannu kan yarjejeniyar fahimtar juna (MOU) da aka tsara don kawo ƙarshen yaƙi.
Da aka tambaye shi game da yarjejeniyar kafin ya shiga motar shugaban ƙasa, Trump ya faɗa wa ‘yan jarida cewa, “An sa hannu. An sa hannu a Versailles. Kawai an sa hannu.”
Bayanin Trump ya biyo bayan sanarwar Iran cewa an kammala yarjejeniyar ta fahimtar juna mai tanade-tanade 14 tare da Amurka bayan shugabannin ƙasashen biyu sun sanya hannu kan yarjejeniyar.
Mai magana da yawun Ma’aikatar Harkokin Wajen Iran, Esmail Baghaei, ya faɗa da safiyar ranar Alhamis cewa “yarjejeniyar Islamabad” ta zama cikakkiya a hukumance bayan Tehran da Washington sun sanya mata hannu, in ji bayanan da kamfanin dillancin labarai na kusa da gwamnatin Iran, Mehr, ya ruwaito.
Baghaei ya ce za a sanya hannun kan yarjejeniyar ta hanyar dijital kuma ya tabbatar cewa tattaunawar da za a yi ƙarƙashin yarjejeniyar za ta mai da hankali ne kawai kan batutuwan nukiliya da janye takunkumi.
Ya ce bangarorin biyu za su yi tattaunawa har zuwa tsawon kwanaki 60, tare da yiwuwar ƙara lokacin idan buƙatar hakan ta taso saboda sarƙaƙiyar batutuwan da za a tattauna.
Mai maganar ya kuma ce alƙawuran Amurka game da janye katangar jiragen ruwa sun fara aiki a zahiri bayan tattaunawar gaggawa da aka yi sakamakon hare-haren Isra’ila kan unguwannin yankin kudu na Bairut da barazanar ramuwar gayya daga Iran.
Ya ƙara da cewa jiragen ruwa na Iran sun riga sun shiga kuma sun fita daga tashoshin jiragen ruwa “ba tare da matsala ba”, yana kwatanta hakan a matsayin alamar cewa alƙawuran Amurka suna fara yin tasiri.
Baghaei ya ce alƙawuran Iran game da Mashigar Hormuz za su fara aiki bayan sa hannu da aiwatar da yarjejeniyar.
A bangare guda kuma, wani jami’in Amurka ya tabbatar wa kamfanin dillancin labarai na Anadolu cewa an sanya hannu kan yarjejeniyar a ranar Laraba.
A cewar kafar labarai ta Amurka, Axios, Shugaban Amurka Donald Trump ya sanya hannu da kansa a kan kwafin yarjejeniyar yayin liyafar cin abinci tare da Shugaba Emmanuel Macron na Faransa a Fadar Versailles.
Ta ce an aike da hoton yarjejeniyar da aka sanya hannu ga ‘yan Iran da ƙasashen da suka shiga tsakani wajen sasancin.
