Waziri wa Ulinzi wa Uturuki, Yasar Guler, amefanya ziara ya pole kwa maafisa wa Libya pamoja na familia za waliopoteza maisha katika ajali ya ndege iliyotokea jijini Ankara, ili kutoa faraja na kuonyesha mshikamano wa Uturuki katika kipindi hiki cha majonzi.
Kwa mujibu wa taarifa iliyotolewa na Wizara ya Ulinzi ya Uturuki kupitia mtandao wa kijamii wa NSosyal, ujumbe wa maafisa wa kijeshi wa Libya pamoja na jamaa wa marehemu uliwasili nchini Uturuki kwa ajili ya kuchukua miili ya waliokufa katika ajali hiyo.
Taarifa hiyo imeeleza kuwa Mkuu wa Majeshi ya Uturuki, Jenerali Selcuk Bayraktaroglu, naye alijiunga katika ziara hiyo ya pole, ambapo kwa pamoja na Waziri Guler walieleza masikitiko yao makubwa kuhusu tukio hilo na kutoa salamu za rambirambi kwa familia za waathirika pamoja na serikali na wananchi wa Libya.
Ajali hiyo ilitokea siku ya Jumanne wakati ndege ya kibiashara aina ya Falcon 50 ilipoanguka muda mfupi baada ya kuondoka katika Uwanja wa Ndege wa Esenboga jijini Ankara, ikiwa njiani kuelekea Tripoli, mji mkuu wa Libya.
Mabaki ya ndege hiyo yalipatikana karibu kilomita mbili kusini mwa eneo la Kesikkavak, katika wilaya ya Haymana jijini Ankara.
Operesheni za utafutaji ziliendelea usiku kucha licha ya mvua kubwa na ukungu mzito, huku shughuli hizo zikisimamiwa kupitia kituo cha uratibu kilichoanzishwa na Shirika la Kukabiliana na Majanga la Uturuki (AFAD).
CHANZO: TRT Afrika
