Cikin firgici da tashin hankali, birnin Maiduguri na jihar Borno ya shiga halin dar-dar bayan wani mummunan fashewar bam da ya girgiza masallaci, lamarin da ya tayar da hankalin al’umma a lokacin da ake shirin bukukuwan karshen shekara.
Rahotanni sun ce wasu da ake zargin ’yan Boko Haram ne suka tayar da bam kirar IED a wani masallacin Juma’a da ke unguwar Gamboru, kusa da yankin Kwastam a tsakiyar Maiduguri. Lamarin ya faru da misalin ƙarfe 6:10 na yammacin Laraba, kasa da sa’o’i 12 kafin Kirsimeti, yayin sallar Magariba.
Duk da cewa ba a tabbatar da adadin wadanda suka mutu ko suka jikkata ba, mazauna yankin sun shaida wa Channels Television cewa mutane da dama sun rasa rayukansu ko suka jikkata.
Kakakin rundunar ’yan sandan jihar, ASP Nahum Daso, ya ce ba zai iya tabbatar da fashewar ba a lokacin da aka tuntube shi, amma ya ce yana kan hanyarsa domin tantance abin da ya faru.
Lamarin ya jefa tsoro a zukatan mazauna Maiduguri, musamman Kiristoci da ke shirin bikin Kirsimeti na 2025, yayin da jami’an tsaro suka killace yankin domin hana ƙarin asarar rayuka da kuma fara bincike.
Tun 2009 Nijeriya ke fama da rikicin ta’addanci a Arewa maso Gabas, rikicin da Majalisar Dinkin Duniya ta ce ya kashe sama da mutane 40,000 tare da raba kusan miliyan biyu da muhallansu. Duk da raguwar hare-hare a ’yan shekarun nan, masana na gargadin yiwuwar karuwar tashin hankali, musamman a yankunan karkara.
