China imejiunga na mataifa mengi duniani kulaani uamuzi wa Israel wa kulitambua eneo la Somaliland, ikisisitiza kuwa hatua hiyo ni kinyume na sheria za kimataifa na inahatarisha umoja wa Somalia.
Akizungumza Jumatatu, msemaji wa Wizara ya Mambo ya Nje ya China, Lin Jian, alisema Beijing inapinga kwa nguvu uamuzi huo na kusisitiza kuwa China inaunga mkono kikamilifu uhuru, umoja na mipaka ya Jamhuri ya Shirikisho ya Somalia. Alieleza kuwa Somaliland ni sehemu isiyotenganishwa ya Somalia na suala lake linapaswa kutatuliwa ndani ya Somalia yenyewe.
China ilionya mataifa ya nje kuacha kuingilia masuala ya ndani ya Somalia, ikisema hakuna nchi inayopaswa kuunga mkono au kuchochea harakati za kujitenga kwa maslahi yake binafsi. Pia ilitoa wito kwa viongozi wa Somaliland kutafakari mwelekeo wao na kuacha kushirikiana na nguvu za nje zinazochochea mgawanyiko.
Kauli hiyo imekuja baada ya Israel kuwa nchi ya kwanza mwanachama wa Umoja wa Mataifa kutangaza kuitambua Somaliland kama taifa huru, hatua iliyokumbana na upinzani mkubwa kutoka mataifa ya Afrika, Mashariki ya Kati na jumuiya mbalimbali za kimataifa.
Somaliland ilijitangazia uhuru mwaka 1991, lakini hadi sasa haijatambuliwa rasmi na Umoja wa Mataifa, huku serikali ya Somalia ikiendelea kusisitiza kuwa eneo hilo ni sehemu halali ya ardhi yake.
CHANZO: TRT Afrika
