Shugaban Amurka ya gargadi ƙungiyar Hamas cewa dole ta ajiye makamai cikin gaggawa, in ba haka ba za ta fuskanci sakamako mai tsanani. Ya ce hakan wani muhimmin ɓangare ne na ci gaba da yarjejeniyar tsagaita wutar da ke gudana a Gaza, yana mai jaddada cewa Isra’ila tana aiwatar da bangarenta na yarjejeniyar.
Ya yi wannan bayani ne a ganawarsa da Firaministan Isra’ila Benjamin Netanyahu a Florida, inda ya nuna cikakken goyon bayansa ga matakin Isra’ila na matsawa zuwa mataki na gaba na yarjejeniyar tsagaita wutar. Trump ya ce yana fatan a shiga mataki na biyu cikin gaggawa domin daga baya a fara gina Gaza da zarar an samu cikakkiyar fahimta.
Trump ya kuma ambaci yiwuwar tattaunawa da Shugaban Turkiyya Recep Tayyip Erdogan kan batun kai dakarun kiyaye zaman lafiya a Gaza. Duk da haka, ya amince cewa har yanzu akwai sabani tsakanin Amurka da Isra’ila kan batun Gaɓar Yamma, kodayake ya ce tattaunawa na cigaba kuma za a fito da mataki a lokacin da ya dace.
