Donald Trump ya bayyana cewa Amurka za ta karɓi ɗanyen man fetur daga Venezuela domin kasuwanci, kuma ya yi bayani dalla-dalla kan yadda za a gudanar da lamarin.
A cewarsa, Venezuela za ta ba Amurka ganga miliyan 30 zuwa 50 na man da aka sanya wa takunkumi, domin a sayar da shi a farashin kasuwa. Ya ce hukumomin rikon ƙwarya na Venezuela za su mika man kai tsaye ga gwamnatin Amurka, kuma shi kansa zai kula da yadda duk kuɗaɗen da za a samu daga sayar da man za su kasance.
Trump ya ce ya ba sakataren makamashi na Amurka umarni da ya aiwatar da shirin cikin gaggawa, tare da tsara yadda za a adana man, sannan daga bisani a aika shi zuwa tashoshin fitar da man fetur na ƙasar.
