Shugabannin tsaron Iran sun yi gargadin cewa ƙasar ba za ta yi shiru ba kan barazanar da ta ce tana fuskanta daga Amurka da Isra’ila, musamman bayan goyon bayan da waɗannan ƙasashe suka nuna ga zanga-zangar adawa a cikin Iran.
Babban hafsan sojin Iran, Janar Amir Hatami, ya bayyana cewa ƙasar ta ɗauki wannan lamari a matsayin barazana kai tsaye, kuma Iran za ta dauki mataki idan aka ci gaba da irin waɗannan kalamai da tsoma baki.
Janar Hatami ya ce idan makiya Iran suka kuskura su dauki matakin da zai yi barazana ga ƙasar, martanin Iran zai kasance mafi ƙarfi fiye da wanda aka gani lokacin yaƙin kwanaki 12 da aka yi da Isra’ila a watan Yuni. Wannan na zuwa ne yayin da tsohon Shugaban Amurka Donald Trump da Firayim Ministan Isra’ila Benjamin Netanyahu suka nuna goyon bayansu ga masu zanga-zanga a Iran, tare da barazanar tsoma baki idan aka yi wa masu zanga-zanga lahani.
Rahotanni sun nuna cewa zanga-zangar ta samo asali ne daga matsalolin tattalin arziki, ciki har da hauhawar farashi da faduwar darajar kudin rial, lamarin da ya jawo hankalin kasashen duniya. A nasa martanin, ma’aikatar harkokin wajen Iran ta zargi Trump da Netanyahu da ƙoƙarin tayar da fitina da kuma kawo cikas ga hadin kan ƙasar.
