Benki ya Maendeleo ya Afrika (AfDB) imeanza ushirikiano mpya na taasisi za kifedha za Kiarabu ili kuziba pengo la ufadhili wa maendeleo barani Afrika, wakati nchi za Magharibi, ikiwemo Marekani, zikikata matumizi ya nje.
Mkutano wa kwanza kati ya AfDB na Arab Coordination Group (ACG) umefanyika Abidjan, ambapo pande zote zilisaini tamko rasmi la ushirikiano. Rais mpya wa AfDB, Sidi Ould Tah, alisema ushirikiano wa karibu na ACG—ambayo inajumuisha Benki ya Maendeleo ya Uchumi Afrika, Mfuko wa OPEC wa Maendeleo ya Kimataifa na Mfuko wa Maendeleo wa Saudi—utasaidia kuhamasisha ufadhili wa muda mrefu kwa vipaumbele kama viwanda na ajira.
Rami Ahmad, makamu wa rais wa OPEC Fund, alibainisha kuwa mbinu mpya itahusisha jukwaa la uratibu kwa miradi mikubwa ya kikanda badala ya uwekezaji wa mara moja katika nchi binafsi.
Kwa miaka mingi, taasisi za Kiarabu zimewekeza mabilioni ya dola katika miradi ya Afrika ikiwemo miundombinu, kilimo na huduma za jamii. Hata hivyo, Tah alionya kuwa “mishtuko ya nje” imepanua pengo la ufadhili, akitaja upungufu wa takribani dola bilioni 402 kwa mwaka unaohitajika kuendeleza bandari, kilimo na miundombinu mingine muhimu.
CHANZO: TRT Afrika
