Shugaban Türkiye Recep Tayyip Erdogan ya shaida wa Shugaban Amurka Donald Trump cewa ƙasarsa na bibiyar halin da ake ciki a Syria sosai, yana jaddada muhimmancin haɗin kan ƙasar, cikakken yankinta da kuma kawar da ta’addanci domin samar da zaman lafiya da kwanciyar hankali a yankin.
A cewar sanarwar Fadar Sadarwa ta Türkiye, shugabannin biyu sun tattauna ta wayar tarho kan dangantakar ƙasashen biyu da kuma batutuwan yankin da na duniya, inda suka yi musayar ra’ayi kan yaƙi da kungiyar ta’addanci ta Daesh da kuma halin ‘yan kungiyar da ke tsare a gidajen yari a Syria. Erdogan ya ce Syria mai zaman lafiya, wadda ta kuɓuta daga ta’addanci kuma take ci gaba a fannoni daban-daban, za ta taimaka matuƙa wajen daidaita yankin Gabas ta Tsakiya.
