Birtaniya ta bayyana matuƙar damuwa kan yadda rikici ke ƙaruwa a yankin West Bank da aka mamaye, tana mai cewa wannan na kara dagula damar samun zaman lafiya a yankin. A wani jawabi da ta gabatar a Majalisar Tsaro ta Majalisar Ɗinkin Duniya, jami’in diflomasiyyar ƙasar, James Kariuki, ya nuna takaicinsa kan hare-haren da ‘yan matsugunan Isra’ila ke kai wa Falasɗinawa, yana kira da a ɗauki matakan hukunta masu laifi cikin gaggawa.
Ya bayyana cewa hare-haren na ƙaruwa kuma ba a ɗaukar isassun matakan dakile su ko hukunta masu aikata su. Dangane da bayanan Majalisar Ɗinkin Duniya, an kashe Falasɗinawa da dama tare da jikkata daruruwa a cikin watannin baya-bayan nan sakamakon rikice-rikicen da suka shafi sojojin Isra’ila da ‘yan matsuguna a yankuna kamar West Bank da Gabashin Kudus.
Haka kuma, Birtaniya ta nuna damuwa kan yadda ake tilasta wa mutane barin gidajensu da kuma rushe gidaje, lamarin da ke kara tsananta halin da ake ciki. Ta kuma soki yadda Isra’ila ke ci gaba da faɗaɗa matsugunanta cikin sauri, tana mai cewa hakan na rage yiwuwar samun mafita ta kasashe biyu, wacce ake ganin ita ce hanya mafi dacewa ta samar da zaman lafiya.
Baya ga haka, Birtaniya ta jaddada cewa halin jin ƙai a Gaza na kara tabarbarewa, inda taimakon jin ƙai ke raguwa sosai kuma ana takaita ayyukan kungiyoyin agaji. Ta bukaci Isra’ila da ta ba da damar shigar da kayan magani, abinci, man fetur da kayan matsuguni cikin sauƙi. A ƙarshe, ta jaddada cewa yin Allah wadai kawai bai isa ba, dole ne a ɗauki matakai na gaske domin kare fararen hula da kuma farfaɗo da tattaunawar zaman lafiya.
MAJIYAR LABARI: AA
