A yayin taron tattalin arziki na duniya a Davos, Shugabar Hukumar Cinikayya ta Duniya (WTO), Dr. Ngozi Okonjo-Iweala, ta ja hankalin gwamnatin Nijeriya da ta yi amfani da wannan dama ta sauye-sauyen tattalin arzikin duniya domin jawo manyan masu zuba jari, ta hanyar tallata ƙasar da gina masana’antu da za su samar da ayyukan yi ga matasa.
Okonjo-Iweala ta ce rikicin kasuwanci tsakanin Amurka da China ya sa kamfanoni ke sauya wuraren samar da kayayyaki, abin da ya haifar da wata babbar dama ga Nijeriya ta karɓi wani kaso na waɗannan masana’antu. Ta bukaci gwamnati ta fito da tsare-tsare na musamman domin jawo masu zuba jari daga ƙasashe kamar China, Amurka da Indiya, ta hanyar ƙarfafa masana’antu a fannoni irin su makamashi mai sabuntawa, masaku, da kayayyakin fasaha, maimakon dogaro da shigo da kaya daga waje. Ta jaddada cewa sauye-sauyen tattalin arziki dole su haifar da ayyukan yi kai tsaye.
