Hukumar ƙwallon ƙafa ta Afirka ta ɗauki matakin ladabtarwa kan wasu ’yan wasan Aljeriya bayan rikicin da ya barke a ƙarshen wasan kwata fainal da Nijeriya ta doke su a gasar AFCON, lamarin da ya jawo ce-ce-ku-ce a tsakanin magoya baya da jami’an wasanni.
Hukumar ƙwallon ƙafa ta Aljeriya (FAF) ta sanar cewa golan su Luca Zidane an dakatar da shi wasanni biyu, yayin da Rafik Belghali ya samu dakatarwar wasanni huɗu saboda halayen da suka nuna bayan shan kashi 2-0 a hannun Nijeriya a kwata fainal.
An kuma ci tarar hukumar FAF dala 100,000 saboda matsalar tsaro da rashin da’a daga ’yan wasa, jami’ai da magoya baya. Rikicin ya barke ne bayan an hana Aljeriya bugun fanareti a wasan da Victor Osimhen da Akor Adams suka zura kwallaye a rabi na biyu. FAF ta ce za ta daukaka kara kan hukuncin, yayin da Super Eagles suka kai wasan kusa da na ƙarshe, daga baya kuma suka lashe matsayi na uku a gasar bayan doke Masar.
