A gaban Babbar Kotun Tarayya da ke Abuja, wani wanda ake tuhuma da hannu a harin bam na ginin Majalisar Ɗinkin Duniya a shekarar 2011 ya bayyana yadda ya shiga ƙungiyar ta’addanci ta Khalid Al-Barnawi, lamarin da ya sake tunatar da jama’a irin tsananin barazanar ta’addanci da Nijeriya ta fuskanta a wancan lokaci.
Wanda ake tuhuma Mohammed Saleh ya bayyana a cikin faifan bidiyo da aka gabatar a kotu cewa ya haɗu da Khalid Al-Barnawi a Bauchi kafin harin ginin UN a Abuja, kuma daga nan ne suka fara hulɗa har ya shiga ƙungiyar.
Shari’ar na gudana ne a matsayin “trial-within-trial” domin tantance ko furucin da aka ɗauka daga hannun wadanda ake zargi ya kasance da son rai. Jami’in DSS mai suna TSR3 ya bayyana yadda aka yi rikodin bidiyo da sautin tambayoyin, tare da ayyukansa na binciken na’urori, hotuna, da shaidu. Kotun ta dage sauraron karar zuwa ranar 2 ga Maris domin ci gaba da bincike.
