Somaliya da Saudiyya sun sanya hannu kan wata yarjejeniyar haɗin gwiwa a fannin tsaro da soji, kamar yadda Ma’aikatar Tsaron Somaliya ta sanar. Yarjejeniyar na da nufin ƙarfafa dangantakar tsaro tsakanin ƙasashen biyu tare da haɗa kai a fannoni masu amfani ga ɓangarorin biyu.
An rattaba hannu kan yarjejeniyar ne a birnin Riyadh, inda Ministan Tsaron Somaliya, Ahmed Moallim Fiqi, da takwaransa na Saudiyya, Khalid bin Salman, suka wakilci kasashensu. A cewar sanarwar hukuma, haɗin gwiwar zai taimaka wajen inganta tsaron yankin da kuma kare zaman lafiyar Tekun Bahar Maliya (Red Sea).
Rahotannin kafafen yada labarai na Somaliya sun ce wannan yarjejeniya na zuwa ne a wani lokaci da dangantakar Somaliya da Saudiyya ke kara karfi, musamman bayan wasu sauye-sauyen siyasa a yankin. Mogadishu na kuma kokarin samun tallafin fasaha da kayan aikin soji daga ƙasashen abokanta domin kare cikakken ikon yankinta da sararin samaniyarta.
Majiyar Labari: AA
