Shugaban Ghana, John Mahama, ya bukaci kasashe mambobin African Union (AU) su mara wa kudirin da ke neman amincewa da zaluncin tarihi da aka aikata ta hanyar cinikin bayi na tekun Atlantika. Ya yi wannan kira ne a gefen taron AU Summit da aka gudanar a Addis Ababa, yana mai cewa matakin zai taimaka wajen tabbatar da gaskiya da adalci na tarihi.
Mahama ya jaddada cewa ko da yake ba za a iya goge abin da ya faru ba, amincewa da cewa cinikin bayi da bautar da aka gina kan wariyar launin fata manyan laifuka ne na da muhimmanci. Ya bayyana cewa wannan batu na da tushe a doka da kuma wajabcin ɗabi’a, yana mai cewa “gaskiya ba za ta iya kasancewa a ɓoye ba.”
Ya kuma nuna cewa tasirin bautar na ci gaba da bayyana har yau, musamman ta hanyar rashin daidaito a tattalin arziki, wariyar launin fata da kuma tsarin zamantakewa. A cewarsa, fuskantar wadannan gaskiyoyi na buƙatar jarumtar ɗabi’a, ba rarrabuwar kai ba.
Mahama ya ce bayan amincewar kudirin, Ghana za ta ci gaba da aiki tare da Majalisar Dinkin Duniya, AU Commission da sauran hukumomi domin zurfafa tattaunawa kan restorative justice da hanyoyin warkar da raunukan tarihi.
Majiyar Labari: AA
