Gwamnatin Tarayya ta Najeriya, ta hannun Ma’aikatar Raya Matasa, ta ƙara ƙaimi wajen tallafa wa matasa ta hanyar ƙaddamar da sabbin baburan lantarki masu amfani da hasken rana. Shirin na nufin haɓaka damar samun aikin yi tare da inganta kirkire-kirkire masu ɗorewa.
An samar da baburan ne ta haɗin gwiwa tsakanin House of Destiny da ƙungiyar masu babura da masu tuka su ta kasa, NATOMORAS. Babbar sakatariyar ma’aikatar, Maryam Ismaila Keshinro, ta yabawa shirin, tana mai cewa zai taimaka wajen rage matsin tattalin arziki da matasa ke fuskanta.
Keshinro ta bayyana cewa shirin ya wuce batun sufuri kawai, domin yana buɗe hanyoyin kasuwanci, dogaro da kai da mutunci ga matasa. Ta ce hakan ya yi daidai da manufofin “Renewed Hope Agenda” na shugaban ƙasa, tare da tallafa wa sauyin tattalin arzikin kore.
Shugabannin abokan hulɗar sun ce shirin na samar da ayyukan yi, ƙarfafa ƙwarewa da kuma ƙara shiga mata a fannoni da aka saba ganin maza ne suka fi rinjaye. NATOMORAS ta bayyana cewa an riga an raba wasu babura a jihohi da dama, tare da shirin faɗaɗa aikin.
Majiyar Labari: TVC NEWS
