Duk da cewa tawagar Super Eagles ta Najeriya ta kasa kai wa wasan ƙarshe na gasar AFCON 2025 bayan shan kaye a bugun fenareti a hannun Morocco, Shugaban Kamfanin BUA, Abdul Samad Rabiu, ya tabbatar da cika alkawarin ba su ladan $500,000 domin yaba ƙoƙari da jajircewar da suka nuna.
Morocco ta samu tikitin zuwa wasan ƙarshe na gasar bayan ta doke Najeriya da ci 4–2 a bugun fenareti a wasan kusa da na ƙarshe da aka buga a gida. Duk da haka, Rabiu ya yabawa ‘yan wasan Super Eagles, yana mai cewa sun ba da duk abin da suke da shi a fili, abin da ya cancanci yabo.
A cikin sakonsa, Rabiu ya jaddada cewa duk da rashin cin nasara kamar yadda aka yi alkawari tun da fari, zai cika alƙawarin biyan kuɗin a matsayin girmamawa ga ƙoƙarin tawagar. Ya ce jajircewa, ƙwazo da haɗin kan da suka nuna sun sa duk ‘yan Najeriya alfahari.
Ya ƙara da cewa wannan kuɗi na $500,000 alama ce ta godiya ga irin tafiyar da suka yi da kuma farin cikin da suka kawo wa ƙasa. Ya kuma ƙarfafa musu gwiwa da su ɗaga kai, yana mai cewa Najeriya na alfahari da su kuma tana sa ran samun nasarori a gaba.
Tun da farko, TVC News ta ruwaito cewa Rabiu ya yi alƙawarin ba Super Eagles jimillar $1.5 miliyan a matsayin lada idan suka yi nasara a gasar AFCON 2025, alkawarin da ya sanar bayan doke Algeria da ci 2–0 a wasan daf da kusa da na ƙarshe a Marrakech.
