Sojojin Iran sun yi barazanar kai hari kan matatun mai da wasu wuraren makamashi a yankin a matsayin martani ga hare-haren da Amurka da Isra’ila suka kai kan kayayyakin makamashi na ƙasar. Kamfanin dillancin labarai na Iran ISNAya ruwaito cewa wannan gargadi ya fito ne daga hedikwatar Khatam al-Anbiya, wacce ke jagorantar rundunonin sojin Iran.
Sanarwar ta ce hare-haren da Amurka da Isra’ila suka kai sun lalata wasu sassan cibiyoyin mai da makamashi tare da wuraren da ke hidima ga fararen hula. Haka kuma Iran ta bukaci kasashen musulmi su gargadi Washington da Tel Aviv da su daina irin wadannan hare-hare.
Hedikwatar ta yi gargadin cewa idan hare-haren suka ci gaba, Iran za ta iya kai martani ta hanyar kai hari kan wuraren makamashi a yankin. Ta kuma yi nuni da cewa rikicin na iya jawo babbar illa ga tattalin arzikin duniya, inda farashin mai zai iya haura dala 200 kan kowace ganga idan rikicin ya kara tsananta.
