Kamfanin Instagram a Japan ya sanar da cewa zai fara amfani da wani sabon fasali da zai sanar da iyaye idan ‘ya’yansu sun yi mu’amala da abubuwan da suka shafi kashe kai ko cutar da kai. Ana sa ran fara amfani da wannan tsarin a cikin wannan shekarar domin ƙara kare matasa a dandalin sada zumunta.
Instagram, wanda kamfanin Meta ke mallaka, ya kuma shirya ƙaddamar da wani tsari da zai rage damar ganin abubuwan da suka shafi miyagun ƙwayoyi ko halaye masu haɗari. Rahoton The Japan News ya ce wannan mataki na daga cikin ƙoƙarin kare matasa daga abubuwan da ka iya cutar da su a intanet.
A karkashin sabon tsarin, idan masu amfani da shekarunsu tsakanin 13 zuwa 17 sun rika neman bayanai masu alaƙa da kashe kai sau da dama, iyayensu za su samu sanarwa ta cikin manhajar ko ta imel, musamman idan asusun yaron yana da alaƙa da na iyayen.
An riga an fara amfani da irin wannan fasalin a ƙasashen Amurka da Birtaniya. Bugu da ƙari, sabon tsarin zai takaita damar matasa ga abubuwan da suka shafi miyagun ƙwayoyi, barazana, ko halaye masu haɗari kamar amfani da makamai. A yanzu ma Instagram na riga ya takaita ganin abubuwan da suka shafi hotunan jima’i, giya da taba sigari ga matasa.
