Shugaban Nijeriya Bola Tinubu ya isa birnin London domin wata ziyarar aiki ta musamman, wadda ita ce irinta ta farko da shugaban Nijeriya ya kai Birtaniya cikin kusan shekaru 40. Ya samu rakiyar uwargidansa Oluremi Tinubu tare da manyan jami’an gwamnati.
Ziyarar, wadda Sarki Charles III da Sarauniya Camilla ke karɓa a Windsor Castle, na nuna muhimmiyar dangantaka tsakanin Nijeriya da Birtaniya. Ana sa ran tattaunawa za ta mayar da hankali kan cinikayya da zuba jari, inda hulɗar kasuwanci tsakanin ƙasashen biyu ta kai fam biliyan 8.1 a shekarar 2025, tare da yarjejeniyar gyaran manyan tashoshin jiragen ruwa biyu a Legas.
Haka kuma, ana sa ran za a ƙarfafa haɗin gwiwa a fannin tsaro da tattalin arziki bayan ganawar Tinubu da Firayim Minista Keir Starmer, tare da tattaunawa kan alakar al’adu da ‘yan Nijeriya da ke zaune a Birtaniya.
Sai dai ziyarar na zuwa ne a lokacin da ake ci gaba da muhawara kan batutuwan tarihi kamar biyan diyya kan bauta da cin zarafi a zamanin mulkin mallaka. Duk da haka, wannan ziyara na nuna sabon mataki na ƙarfafa alaƙar zamani tsakanin ƙasashen biyu.
