Shugaban Ukraine, Volodymyr Zelenskyy, ya kai ziyara ƙasar Saudiyya a ranar Juma’a inda ya gana da Yarima mai jiran gado, Mohammed bin Salman. Wannan ziyara na zuwa ne yayin da Ukraine ke ƙoƙarin faɗaɗa haɗin gwiwarta da ƙasashe daban-daban a lokacin yaƙin da take ciki.
Zelenskyy ya bayyana cewa tattaunawar ta mayar da hankali kan tsaro, makamashi da kuma gine-gine, yana mai cewa dangantakar Ukraine da Saudiyya tana da anfani ga ɓangarorin biyu. Ya kuma nuna cewa wannan wani ɓangare ne na ƙoƙarin Kyiv na gina ƙawance mai ƙarfi a wajen Turai.
A gefe guda, ya ambaci irin nasarorin diflomasiyya da aka samu a Turai, inda Ukraine ta samu tabbacin tallafin kuɗi domin ƙarfafa juriyarta. Ya gana da shugabannin ƙasashe da dama ciki har da Lithuania, Denmark, Cyprus da kuma jami’an Tarayyar Turai, inda ya jaddada cewa yanzu Ukraine na ƙara faɗaɗa haɗin gwiwarta zuwa Gabas ta Tsakiya, yankin Gulf da kuma Caucasus.
Wannan mataki na bin sahun yarjejeniyoyin da aka cimma a watan Maris ne, lokacin da Ukraine ta kulla yarjejeniyar haɗin gwiwar tsaro na shekaru 10 da Saudiyya da Qatar—wanda ya zama ɗaya daga cikin yarjejeniyoyin dogon lokaci na farko da ƙasar ta yi a yankin.
MAJIYAR LABARI: AA
