Dukkan idanu sun koma birnin Rabat yayin da ƙungiyoyin kwallon kafa biyu masu ƙarfi a Afirka, Najeriya da Morocco, ke shirin karawa a wasan kusa da ƙarshe na gasar AFCON 2025. Wasan zai gudana a filin Prince Moulay Abdellah a daren Laraba, inda Morocco ke neman yin tarihi a gida, yayin da Super Eagles ke fatan komawa wasan ƙarshe na gasar.
Najeriya, wadda ta lashe AFCON sau uku, ta shiga wasan ne bayan rawar gani da ta yi tun daga farkon gasar. Tana da cikakken nasara a wasanni biyar, tare da zura kwallaye 14, ciki har da nasarar 2-0 da ta samu kan Algeria a kwata-fainal. Ɗan wasan gaba Victor Osimhen da Ademola Lookman na daga cikin taurarin da ke ja-gorantar tawagar Éric Chelle.
Morocco kuma na zuwa da cikakken ƙarfi, inda take da jerin wasanni ba tare da rashin nasara ba, tare da fatan sake ɗaukar kofin AFCON bayan na ƙarshe da ta lashe a 1976. Tauraron Real Madrid, Brahim Diaz, wanda ke da kwallaye biyar a gasar, da Achraf Hakimi na PSG, na daga cikin manyan barazanar da Atlas Lions za su yi amfani da su a gaban magoya bayansu.
A bangaren labarin ‘yan wasa, Najeriya ba za ta samu damar amfani da kyaftin Wilfred Ndidi ba sakamakon katin gargadi, yayin da Raphael Onyedika ke sa ran cike gibinsa. Morocco kuwa na da cikakkiyar tawaga ba tare da manyan raunuka ba.
A tarihin karawarsu a AFCON, Morocco ta fi rinjaye, inda ta doke Najeriya sau uku cikin wasanni biyar da suka fafata, ciki har da nasarar 3-1 a 1976 da kuma 1-0 a 2004. Duk da haka, wasan na wannan shekarar na ɗauke da alƙawarin gasar da za ta iya canza tarihi.
