Baraza la Usalama la Umoja wa Mataifa limewawekea vikwazo makamanda wanne wa Jeshi la Msaada wa Haraka (RSF) nchini Sudan kwa tuhuma za ukiukaji mkubwa wa haki za binadamu wakati wa kutekwa kwa mji wa Al Fasher mwezi Oktoba mwaka jana.
Walioorodheshwa katika vikwazo hivyo ni naibu makamanda Abdelrahim Hamdan Daglo na Gedo Hamdan Ahmed, pamoja na Brigedia Jenerali Al-Fateh Abdullah Idris na kamanda wa uwanja Tijani Ibrahim. Uchunguzi wa Umoja wa Mataifa umehusisha vikosi vya RSF na mauaji ya raia, ukatili wa kijinsia na mashambulizi yaliyolenga makabila fulani wakati wa kuzingirwa kwa muda mrefu kwa mji huo.
Tangu Aprili 2023, Sudan imekumbwa na mapigano makali kati ya RSF na jeshi la serikali, hali iliyosababisha maelfu ya vifo na mamilioni ya watu kuyahama makazi yao huku nchi ikikabiliwa na janga kubwa la kibinadamu.
Ripoti zinaeleza kuwa operesheni ya kuuteka mji wa Al Fasher ilihusisha mashambulizi ya siku kadhaa yaliyoambatana na mauaji ya raia na vitendo vya ukatili. Baadhi ya makamanda hao tayari wamewekewa vikwazo na Marekani pamoja na washirika wake wa kimataifa.
CHANZO: TRT Afrika
