Lt. Janar Tukur Buratai (mai ritaya) ya shigar da ƙarar bata suna ta ₦1 biliyan a kan Maj. Janar Ali-Keffi (mai ritaya), yana zargin sa da yaɗa kalaman ƙarya da suka danganta shi da tallafa wa ta’addanci da alaka da Boko Haram. An shigar da ƙarar ne a Kotun Tarayya da ke Kaduna a ranar Alhamis.
A cewar takardun kotu, Buratai ya ce Ali-Keffi ya yi wasu hirarraki a 2025 da aka wallafa a kafafen yanar gizo da shafukan sada zumunta, inda aka yi zargin cewa Buratai na da hannu wajen rufe laifukan da suka shafi ta’addanci a lokacin da yake Shugaban Sojin Ƙasa. Buratai ya musanta dukkan zarge-zargen, yana jaddada cewa ba a taɓa bincike ko tuhumar sa kan ta’addanci ba.
Ya nemi kotu ta umurci Ali-Keffi da ya janye kalaman, ya ba da cikakkiyar neman afuwa a fili, tare da hana shi sake wallafa irin waɗannan zarge-zarge. Haka kuma, yana neman diyyar ₦1bn da kuma kuɗin shari’a. Kotun ta bai wa Ali-Keffi wa’adin kwanaki 21 ya bayyana.
