Ma’aikatar Iyali da Hadin Kai ta Burkina Faso ta gabatar wa abokan hulɗarta Tsarin Amsa na Agajin Jin Kai (PNRH) 2026, wanda kudinsa ya kai biliyan 769.8 na CFA, daidai da dala biliyan 1.3. Tsarin na nufin tallafawa mutane 4,474,321 masu rauni, ciki har da mazauna da ke karbar ‘yan gudun hijira, ‘yan gudun hijira na cikin gida, masu dawowa gidajensu da kuma ‘yan gudun hijira daga kasashen waje.
Minista Passowendé Pélagie Kaboré ta bayyana cewa kula da wadannan jama’a na bukatar babbar hadin gwiwa da kuma tara kudade daga dukkan masu ruwa da tsaki. Ta jaddada muhimmancin samar da hanyoyin kirkira da inganta daidaito wajen tattara albarkatu domin biyan bukatun gaggawa.
Jami’in kula da ayyukan Majalisar Dinkin Duniya a Burkina Faso, Maurice Azonnankpo, ya yaba da jagorancin gwamnati, yana mai cewa hakan na nuna karfin niyyar siyasa da hangen nesa mai ma’ana. Ya kuma sanar da cewa abokan hulɗar agajin jin kai sun kuduri aniyar tara dala miliyan 658.5 domin samar da taimakon gaggawa ga mutane miliyan 2.7 a shekarar 2026.
A shekarar 2025, sama da abokan hulɗa 155 sun tara dala miliyan 271.3, inda aka tallafawa mutane miliyan 1.7 a fadin kasar.
Majiyar Labari: AA
