Bayan wasan ƙarshe na AFCON da ya cika da rikici, fushi da ce-ce-ku-ce a birnin Rabat, Hukumar Ƙwallon Ƙafa ta Afirka (CAF) ta bayyana damuwa kan halayen da aka nuna a filin wasa, tana mai cewa za ta ɗauki mataki kan duk wanda aka samu da laifi, domin kare martabar gasar da kuma tabbatar da adalci a harkar wasa.
CAF ta ce tana nazarin bidiyoyin abubuwan da suka faru a wasan ƙarshe tsakanin Senegal da Morocco, inda wasu ‘yan wasan Senegal suka fice daga fili domin nuna rashin amincewa da hukuncin alƙalin wasa na bai wa Morocco bugun fenariti a lokacin ƙarin lokaci.
An kuma samu arangama tsakanin magoya bayan Senegal da jami’an tsaro. Duk da haka, mai tsaron ragar Senegal Edouard Mendy ya tare bugun fenaritin, sannan Senegal ta ci ƙwallon nasara ta hannun Pape Gueye a ƙarin lokaci, ta lashe kofin da ci 1-0. CAF ta ce ba za ta ɗaura laifi ga kowace ƙasa ba, amma za ta hukunta duk wanda aka tabbatar da laifinsa.
