Bayan shekaru na gina manyan tituna, layukan dogo da manyan ayyukan more rayuwa a Afirka, ƙasar China na sauya salo a harkar zuba jari, inda take rage manyan ayyuka masu tsada tare da mai da hankali kan ƙananan shirye-shirye da ke da riba kai tsaye da kuma ƙarancin haɗarin bashin da ƙasashen Afirka ke fuskanta.
Rahoton Jami’ar Boston ya nuna cewa rancen da China ke bai wa Afirka ya ragu zuwa dala biliyan 2.1 a shekarar 2024, ƙasa da rabin abin da aka bayar a baya, kuma mafi ƙanƙanta tun bayan annobar COVID-19.
China ta daina mayar da hankali kan manyan ayyukan dogo da tituna, ta koma kan ƙananan ayyuka masu riba da kuma zuba jari kai tsaye (FDI), tare da fara bayar da rance da kudin yuan maimakon dalar Amurka. Angola ta zama babbar mai amfana da kusan dala biliyan 1.45 don sabunta wutar lantarki da hanyoyi, yayin da Kenya, Masar, DRC da Senegal suma suka amfana da ƙananan shirye-shirye.
