Gwamnatin Jamhuriyar Dimokuraɗiyyar Congo (DRC) ta sanar da tsayar da Juliana Amato Lumumba a matsayin ‘yar takara don kujerar Sakatare Janar na Ƙungiyar Ƙasashen Faransanci (OIF). Sanarwar da ma’aikatar yaɗa labarai ta fitar ta ce DRC na son taka rawa wajen sabunta da kuma ƙarfafa tasirin Faransanci a duniya ta hanyar shugabanci mai zamani da kusanci da jama’a.
Ministan da ke kula da harkokin Faransanci da ’yan diaspora, Crispin Mbadu Phanzu, ya bayyana Lumumba a matsayin ‘yar takarar da ke da hangen nesa da jajircewa, musamman wajen tallafawa mata da matasa. An jaddada gogewarta na sama da shekaru 30 a fannonin mulki, diflomasiyya da haɗin gwiwar ƙasa da ƙasa.
Lumumba, ’yar tsohon Firayim Ministan Congo Patrice Lumumba, ta taɓa rike mukaman gwamnati ciki har da Ministar Al’adu, sannan ta yi aiki a matakin nahiyar Afirka a bangaren kasuwanci da haɗin kai. Ta kuma kware a harsuna da dama, ciki har da Faransanci, Turanci da wasu harsunan Afirka.
Za ta fafata ne da Louise Mushikiwabo ta Rwanda, wadda ke jagorantar OIF tun 2018 kuma ke neman wani wa’adi. Ana sa ran za a gudanar da zaɓen shugabancin kafin ƙarshen 2026 a Cambodia, inda mambobin OIF za su cim ma matsaya ta hanyar yarjejeniya ko kuri’a.
