Erdogan ya ce lokaci ya yi da Turkiyya za ta koma cikin shirin jiragen yaƙi na F-35, musamman ganin cewa hakan zai bude sabon babi a hulɗar Ankara da Washington tare da ƙarfafa tsaron NATO.
A cikin martaninsa ga Bloomberg, Erdogan ya tunatar da ganawarsa da Donald Trump a 2025 a Fadar White House, inda ya ce koriwar Turkiyya daga shirin saboda sayen kayan soji daga Rasha shekaru goma da suka gabata ba ta da adalci. Ya ce dawowar Trump ta samar da sabon dama ga dangantakar ƙasashen biyu.
Erdogan ya bayyana cewa karɓar jiragen F-35 da Turkiyya ta riga ta biya kudinsu, tare da sake dawo da ita cikin shirin, ya zama wajibi domin tsaron Amurka, NATO da kuma zaman lafiya na yanki. Ya kuma yi tsokaci kan yiwuwar sayen jiragen F-16 guda 70, yana mai cewa sharuɗɗan sayen ya kamata su dace da manufar NATO.
Game da batun bankin Halkbank, Erdogan ya ce Turkiyya na kallon zarge-zargen da ake yi a matsayin kuskure, tare da neman adalci ta hanyar tattaunawa. Haka kuma ya jaddada cewa Turkiyya tana kara ƙarfafa haɗin gwiwar makamashi da Amurka, musamman LNG, domin kare tsaron makamashinta.
A bangaren rikicin Rasha da Ukraine, Erdogan ya ce Turkiyya ce ƙasar da ke iya magana kai tsaye da shugabannin ƙasashen biyu, tare da sa ran karɓar bakuncin tattaunawar zaman lafiya a nan gaba. Ya kuma soki manufofin Netanyahu a Falasdinu, yana mai nanata cewa Turkiyya na da muhimmiyar rawa a shirin samar da zaman lafiya a Gaza.
Majiyar Labari: TRT AFRIKA
