Gwamnatin Faransa ta sanar da cewa tana shirya karin jiragen sama domin dawo da ‘yan ƙasarta da ke Dubai bayan da daya daga cikin jiragen da aka tura domin wannan aiki ya tilasta komawa baya saboda harba makamai masu linzami. Ministar da ke kula da ‘yan Faransa a kasashen waje, Éléonore Caroit, ta bayyana hakan yayin wata hira da tashar Franceinfo.
Ta ce an riga an shirya jirage hudu domin kwaso ‘yan Faransa daga Hadaddiyar Daular Larabawa, amma daya daga cikinsu bai samu damar sauka a Abu Dhabi ba saboda yanayin tsaro. Saboda haka aka sake tsara wasu sabbin tashi domin tabbatar da cewa ‘yan kasar sun samu damar komawa gida cikin aminci.
Caroit ta jaddada cewa tsaron ‘yan Faransa shi ne fifiko na farko ga gwamnati, don haka ba za a bar jirgin ya sauka ba idan babu tabbacin tsaro. Ta kuma kara da cewa ana aiki tare da kamfanonin jiragen sama domin dawo da zirga-zirgar jiragen kasuwanci a lokaci guda da jiragen da gwamnati ta shirya.
Tun bayan fara rikicin Gabas ta Tsakiya, kimanin ‘yan Faransa 5,000 ne suka nemi a dawo da su gida. Daga cikinsu, kusan 750 sun riga sun dawo ta jiragen da gwamnati ta tanada, yayin da kusan 2,000 suka dawo ta jiragen kasuwanci. Hukumomi sun ce za su ci gaba da shirya irin wadannan jirage domin taimaka wa sauran ‘yan kasar su dawo cikin tsaro.
