Wani masanin tattalin arziki, Paul Alaje, ya yi gargadin cewa farashin fetur a Najeriya na iya kaiwa kusan ₦1,000 kan kowace lita idan rikicin da ke tsakanin Amurka, Isra’ila da Iran bai lafa ba. Wannan na zuwa ne bayan rahoton da ya nuna cewa matatar Dangote ta kara farashin fetur daga ₦774 zuwa ₦874 kan kowace lita, karin ₦100 ke nan. An kuma fara sake lodin fetur da sabon farashin, yayin da ‘yan kasuwa suka fara sabunta farashinsu.
Binciken kasuwa ya nuna cewa wasu ‘yan kasuwa na sayar da PMS a ₦900 kan kowace lita, yayin da wasu wuraren ajiya suka dan rage zuwa ₦895. Wannan sauyi cikin gaggawa ya nuna yadda tashin farashin danyen mai a duniya ke tasiri kai tsaye ga kasuwar man fetur ta cikin gida.
Alaje ya bayyana cewa idan danyen mai ya kara tashi, farashin fetur, dizal da man jirgin sama ma za su biyo baya, lamarin da zai kara hauhawar farashi a kasa baki daya. Ya ce idan fetur ya kai ₦1,000, farashin sufuri, tikitin jirgi da rayuwar yau da kullum za su kara tsananta, musamman ga talakawa da matsakaitan jama’a.
A gefe guda kuma, shugaban rukunin Dangote, Aliko Dangote, ya bayyana aniyarsa ta fadada harkokinsa zuwa bangaren karafa, wutar lantarki da tashoshin jiragen ruwa domin bunkasa masana’antu a Afirka. Matatar Dangote dai na samar da kusan ganga 650,000 na kayayyakin mai a kullum, amma har yanzu ba ta fitar da sanarwa a hukumance kan karin farashin ba.
Majiyar Labari: Channels News
