Gwamnatin Ghana ta kori baƙi 68 daga yankin Ashanti bayan kotu ta same su da laifuka daban-daban, ciki har da manyan laifukan ƙungiyoyi, karuwanci da wasu ayyukan da suka saba doka. Daga cikin waɗanda abin ya shafa, ‘yan Najeriya ne suka fi yawa, abin da ke nuna yadda Ghana ke ƙara tsaurara matakan tsaron iyakarta, duk da burin da kasashen Afirka ke da shi na sauƙaƙa zirga-zirga tsakanin juna.
Rahotanni sun bayyana cewa daga cikin baƙin da aka kora akwai ‘yan Najeriya 42, ‘yan Kamaru 13, ‘yan Benin 7, ‘yan Ivory Coast 3, da ‘yan Burkina Faso 3. Hukumar Kula da Shige da Fice ta Ghana (GIS) ce ta aiwatar da aikin bayan an kammala dukkan hanyoyin shari’a, kamar yadda Ministan Yankin Ashanti, Frank Amoakohene, ya bayyana.
A wata sanarwa da ya wallafa a shafinsa na Facebook, Amoakohene ya yaba wa GIS bisa nuna ƙwarewa, jajircewa, da bin doka wajen aiwatar da dokokin shige da fice, tare da jaddada cewa an mutunta martabar ɗan Adam kuma an bi ka’idojin shari’a yadda ya kamata. Ya kuma ce haɗin gwiwar jami’an shige da fice, kotuna, da sauran hukumomin tsaro na da matuƙar muhimmanci wajen tabbatar da tsaron jama’a da kare masu rauni a yankin.
Ko da yake hukumomi ba su bayyana cikakken bayanin laifin kowane mutum ba, sun tabbatar da cewa korar ta biyo bayan hukuncin kotu da ya shafi damfara da ake danganta da Q-Net, ƙungiyoyin karuwanci, da sauran ayyukan laifi.
